Read & Enjoy All Type of Poetry, Stories, Text messages and much more......

Thursday, November 1, 2007

Karvan Gujar Gaya

Swapan jhade phool se, meet chubhe shool se
Lut gaye singar sabhi bagh ke babool se
Aur hum khade-khade, bahar dekhte rahe
Karvan gujar gaya, gubar dekhte rahe

Neend bhi khuli na thi ki haye dhoop dhal gayi
Paaon jab talak uthe ki jindagi fisal gayi
Paat paat jhar gaye ki shaakh-shaakh jal gayi
Chah to nikal saki na par umar nikal gayi
Geet ashk ban gaye, chand ho dafan gaye
Sath ke sabhi diye, dhuan pahan-pahan gaye
Aur hum jukhe jukhe, mod par ruke ruke
Umar ke chadav ka uttaar dekhte rahe
Karvan gujar gaya, gubar dekhte rahe

Kya shabab tha ki phool phool pyar kar utha
Kya shringar tha ki dekh aaina sihar utha
Is taraf jameen aur aasma udhar utha
Thaam kar jigar utha ki jo mila nazar utha
Ek din magar yahan, aisi kuch hawa chali
Loot gayi kali kali ki ghut gayi gali-gali
Aur hum lute-lute, waqt se pite pite
Sans ki sharab ka khumaar dekhte rahe
Karvan guzar gaya, gubar dekhte rahe

Ho saka na kuch magar, shaam ban gayi sahar
Wah uthi lahar ki dah gaye kile bikher-bikher
Aur hum dare-dare, neer nayan main bhare
Odhkar kafan, pade mazaar dekhte rahe
Karvan guzar gaya, gubar dekhte rahe

Maang bhar chali ki ek, jab nayi nayi kiran
Dholkein dhoomak uthi, thumak uthe charan-charan
Shor mach gaya ki lo chali dulhan, chali dulhan
Gaon sab umad padad, bahak uthe nayan nayan
Par tabhi jahar bhari, gaaj ek wah giri
Puch gaya sindur tar-tar hui chunari
Aur hum anjaan se, dur ke makaan se
Palaki liye hue kahaar dekhte rahe
Karvan guzar gaya, gubar dekhte rahe

0 comments:

Powered by Blogger.

© 2011 Aadab Arz Hai..., AllRightsReserved.

Designed by ScreenWritersArena